Shkolla e MagjistraturësShkolla e Magjistraturës, më datë 5 mars 2025, zhvilloi aktivitetin trajnues me temë: “Marrëdhëniet e gjykatave me median. Qëllimi kryesor i komunikimit. Aktorët që “duhet” e që “munden” të komunikojnë me median apo me audiencat. Përparësitë dhe kufizimet. Liria e shprehjes së gjyqtarëve dhe prokurorëve. Kufizimet në lirinë e shprehjes për gjyqtarët dhe prokurorët. Sekreti hetimor dhe liria e shprehjes”, pranë ambienteve të Shkollës së Magjistraturës, në Tiranë.
Ky aktivitet u drejtua nga:
Ekspertë: Erjon Muharremaj dhe Perikli Zaharia
Lehtësues: Marinela Nuni
Qëllimi i këtij trajnimi është: Besimi i publikut në sistemin e drejtësisë është një nga themelet në të cilin mbështetet shteti i së drejtës. Këto themele janë të shëndosha kur komunikimi me publikun është i hapur dhe transparent. Për të realizuar këtë, mediat duhet të bëhen aleatët e gjykatave/prokurorive. Ky trajnim synon shtjellimin dhe diskutimin e çështjeve që lidhen me qëllimet kryesore të komunikimit, aktorët që duhet të komunikojnë me publikun, si edhe me lirinë e shprehjes së gjyqtarëve dhe prokurorëve, përfshirë kufizimet që lidhen me çështjet e etikës apo me sekretin hetimor.
Trajnimi u realizua duke ndërthurur prezantimet (deri në 20-30 min) me diskutimin e çështjeve të shtruara (pyetjeve vetë studimore; pyetje-përgjigje) dhe ushtrimeve me raste praktike & kuize, për të nxitur dhe realizuar ndërveprimin aktiv të pjesëmarrësve.
Gjatë këtij aktiviteti trajnues u trajtuan tema të ndryshme, si:
- Qëllimet dhe aktorët kryesorë të komunikimit të gjykatave/prokurorive me median. Roli i mediave tradicionale dhe atyre platformave dixhitale të komunikimit për përcjelljen e mesazhit te publiku. Liria e shprehjes dhe mbrojtja e personalitetit për gjyqtarët dhe prokurorët në kuadër të miradministrimit të drejtësisë. Standardet dhe praktika ndërkombëtare e kombëtare;
- Liria e shprehjes së gjyqtarëve dhe prokurorëve. Kufizimet. “Magjistrati-qytetar”. Shtrirja e së drejtës për lirinë e shprehjes së magjistratëve; Kufizimet e tyre të lirisë së shprehjes; Liria e shprehjes së magjistratëve on line; Pjesëmarrja e magjistratëve në debatet publike;
- Marrëdhëniet e magjistratëve me median;
- Sekreti hetimor sipas dispozitave procedurale penale dhe Kodit Penal. Cilat janë aktet hetimore sekrete. Roli i organeve proceduese në ruajtjen e sekretit hetimor dhe ndalimit të publikimit të akteve sekrete dhe jo sekrete. Veprat penale që lidhen me zbulimin e akteve ose të dhënave sekrete dhe publikimin e tyre. Detyrimet e magjistratëve në ruajtjen e autoritetit gjyqësor dhe administrimit të sekretit hetimor në raport me lirinë e shprehjes dhe të drejtën e marrjes së informacionit. Publikimet që mund të shkaktojnë shkeljen e sekretit hetimor dhe konfidencialitetit të hetimeve dhe të prezumimit të pafajësisë sipas GJEDNJ-së etj.
Në këtë aktivitet trajnues morën pjesë gjyqtarë dhe kancelarë të Republikës së Shqipërisë.
